آند ايچيرم

دالغالي[1] گؤللرينه آند ايچيرم

دامغالي[2] اللرينه آند ايچيرم

قويماريق باغلي قالا قوللاريميز

قورويا گول-بوتاميز، خوللاريميز

يئته دوستاق[3] ديبينه يوللاريميز

باغلانان قوللارينا آند ايچيرم

كسيلن يوللارينا آند ايچيرم

قويماريق آل گونشين رنگي سولا

قورخولوق يوردوموزا كؤلگه سالا

چن توتا آرزو يولون، گؤز قارالا

آغاران تئللرينه آند ايچيرم

چن توتان بئللرينه آند ايچيرم

قويماريق غم دنيزي دالغالانا

گتيره تولكو فئلي[4] خلقي جانا

اودوموز اؤزگه اوجاغيندا يانا

سارالان گوللرينه آند ايچيرم

ساري بولبوللرينه آند ايچيرم

يازاريق قوچ نبي نين شانلي سؤزون

چالاريق سازدا ائلين جانلي سؤزون

دووياريق خان آرازين قانلي سؤزون

سارالي سئللرينه آند ايچيرم

يارالي ائل لرينه آند ايچيرم

سحر خانيم

---

[1] دالغا: موج، ارتعاش

[2] دامغالي: داغ دار

[3] دوستاق: زندان

[4] فئل: فتنه، حيله

قارداشيم سليمان رستمه

بيزي يانديرير، يامان آيرليق

بوداريخديران دومان آيرليق

باشا صاوورور صامان آيرليق

آمان آيرليق، آمان آيرليق

آمان آيرليق، آمان آيرليق

بير گؤزون آچار، بير گؤزون يومار

آرازي سرين گؤردوكده اومار

خزري ده رين گؤردوكده جومار

قان درياسينا جومان ايرليق

آمان آيرليق، آمان آيرليق

آرازيم وورسون باش، داشدان- داشا

گؤز ياشي گرك باشلاردان آشا

نئجه ياد اولسون، قارداش- قارداشا

نه دين قانير، نه ايمان آيرليق

آمان آيرليق، آمان آيرليق

گؤيلرين، گونون- آيين گيزله دير

اولدوز آخديرير، صايين گيزله دير

اوخونو آتير، يايين گيزله دير

قدديمي ائديب كمان آيريليق

آمان آيرليق، آمان آيرليق

آيريليق گله، بير كرم قيلا

بير نئچه گونده، بيزدن آيريلا

غمده بير بيزتك صويا صوورولا

هاني بير بئله گومان آيرليق

آمان آيرليق، آمان آيرليق

دئديم آيريليق، قيناما مني

سني گؤرموشم ائللر دشمني

يوزمين كره ده صيناسام سني

همان آيريليق، همان آيرليق

آمان آيرليق، آمان آيرليق

آمانسيز گؤزون يومان آيريليق

جان جيزليغيندان اومان آيريليق

نه غملي يازار (رومان) آيريليق

ديللره صالان دومان آيريليق

آمان آيريليق، آمان آيريليق

سن اونوتسان دا (سليمان[1]) مني

انوتماياجاق (شهريار) سني

ياز گله ر، بولبول قاپسار چمني

ايندي ليك سئوسين زمان آيريليق

آمان آيرليق، آمان آيرليق

---

[1] سليمان رستم

آللاه بویاغی

استاد شهریار بو شعری، عثمانلی شاعری یحیی کمال بیاتلی نین

آهسته چک کوره کلری محراب اویانماسین
بو عالم خیاله دالان،  آب اویانماسین

مطلعلی شعری نین تأثیرینده یازیب دیر

---

اسلام اویاتدی خلقی، باشین قاوزایان قاچیر
شیطان باجارمادی کی یاتانلار اویانمایسن
هر رنگی آت، فقط بویان آللاه بویاغینا
هر آلدادان بویاقلارا قلبین بویانماسین
خلقین گؤزون اویاردی شاهین میر غضبلری
قوی بیر اویولسون اؤز گؤزو تا گؤز اویانماسین
تبلیغ او پایه ده گرک اولسون که مدعی
بیر نقطه سینده ضعفینه بارماق قویانماسین
الفاظی محکم ائتمه لی، معنانی چوخ لطیف
سؤزلر گرک صوغاندیسا، هر کس صویانماسین
آما گئجه نماز دا قیلیرسان، یاواشجا قیل
قوی زحمت ایله هوشلانان اولسا، اویانماسین
آغزیندا دادلی سؤزلریوی سن ده (شهریار)
ائیله پیشیر کی خلق دادیندان دویانماسین

استاد شهریار

اویون اولدوق

ایتیمیز قورد اولالی، بیزده قاییتدیق قویون اولدوق

ایت ایله قول بویون اولدوق

ایت الیندن قاییدیب،قوردادا بیرزاد بویون اولدوق

ایت ایله قول بویون اولدوق

قوردوموز دیشلرینی هئی قارا داشلاردا ایتیتدی

قویونوندا ایشی بیتدی

صون، صوخولدو سورویه، بیر سورونو سووکدو-داغیتدی

اکلیب، ایت گئدیب ایتدی

بیزده باخدیق ایت ایله قورد آراسیندا اویون الدوق

ایت ایله قول بویون اولدوق

استاد شهریار

ایکینجی آ حرفی له باشلانان بایاتیلار

آی چئخدی پشمان – پشمان
گون چئخدی اودا دشمان
باش گوتوروب گئده رم
نه دوست بولسون نه دوشمان

——————————————

آلچالار آی آلچالار
تپاقی یاشیل چالار
تابوتوم گئن نن آپار
دشمان گورر اَل چالار

——————————————

آشدیم یازیلار گوردوم
نه تام آرزیلار گوردوم
چوبان داغدان ائننده
چوخلی قوزولار گوردوم

——————————————

آی چئخدی یانی یانی
گورونر بیرجه یانی
دوستلا دشمنوی
دارا دوشنده تانی

——————————————

او کیمدی آتار منی
هر درده قاتار منی
نامرد گه لیب مرد اولماز
دوستلیقدا ساتار منی

——————————————

آغ آلما آللانیبدی
بوداقدا ساللانیبدی
جوان دئیه وردیلر
سققلی چاللانیبدی

——————————————

امان فلک، داد فلک
هئچ اولمایم شاد فلک
ایچرتدگین شربتدن
ئوزونده بیر داد فلک

——————————————

الینده گوزل آلما
توتوبدور گوزل آلما
ائل چرکنین آل عاشق
حیاسیز گوزل آلما

——————————————

آل قلیانی، اودلا
رقیب توتسون اودلا
یاخشیلیق ائله عاشق
سنه قالسا اودلا

——————————————

اوسونچی اوسون ایلر
تشنیه او سو نیلر ؟
یارسیز دیریلمز صمد
طبیب یوز اوسون ایلر

بیرینجی آ حرفی له باشلانان بایاتیلار

بایاتیلار باشلاندی
عشق اوره کده جوشلاندی
دوستلارا خبر وئرون
منیم تویوم باشلاندی

———————————————-

ائلیم گونوم تالاندی
اوستونه اود قالاندی
یاد الیندن ائل کوچدو
بیر داغا دالدالاندی

———————————————-

اوخشاسین دیلیم سنی
بویوتسون ائلیم سنی
میداندا آت اوینادان
بیر ایگید بیلیم سنی

———————————————-

آغ جورابی گئیرلر
آغ آلمانی سویارلار
آجیغووا گلمه سین
خوشگله سوز دیللر

———————————————-

اوچی ورار مارالی
داغدا گزر یارالی
فلگه نیله میشم
سالدی سندن آرالی

———————————————-

اوتای بوتایا باخیر
آراسیندان چای آخیر
کور اولسون منیم گوزوم
سنسیز دنیایه باخیر

———————————————-

اوخ آتدیم دوزه دوشدی
کپریکلر گوزه توشدی
هامیا پوشک آتدیلار
آیریلیق بیزه توشدی

———————————————-

اورمی گولی دریندی
بولاخلاری سریندی
بیر گونلوم وار سینمده
مینی گلسه سنوندی

———————————————-

اوسکی نین کوچه لری
بار امیر بچه لری
یاتاسان یار قوینوندا
پاییزین گئجه لری

———————————————-

آغلارام آغلار کیمین
دردیم وار داغلار کیمین
خزل اولوب توکللم
ویرانه باغلار کیمین

———————————————-

آرازیم آرام یئری
سیزیلدار یارام یئری
هر محنته دوزه رم
کسیلیب چارام یئری

———————————————-

آینانی آتدیم دوزه
شوقی دوشوب تبریزه
شوکور الحمده و لله
ایشیمیز دوشوب ئوزه

———————————————-

ایاغیندا قوندورا
یار گلیر دورا-دورا
جوانلیغیم چورودو
باغریما وورا-وورا

———————————————-

آراز آراز خان آراز
بیر دردیمی قان آراز
گوز یاشینا باخان یوخ
قوی توکولسون قان آراز

———————————————-

آی دوغار، الک کیمی
شانسیم یوخ فلک کیمی
یاریم حامامدان چیخیب
نور اوزلی ملک کیمی

———————————————-

آرمرد آغاجی الی
دیبینده مخمر خلی
گویدن بیر نامه گلدی
یا محمد یا علی

———————————————-

آراز گلیر قیقاچی
گتریر بیر جوت باجی
بیری منیم سووگولوم
بیری باشمین تاجی

———————————————-

آرازین کوکونه باخ
اوروسون مشقینه باخ
درد الیندن اوخورام
گورن دئیر عشقینه باخ

———————————————-

آرازین دشتینه باخ
گوزومون یاشینه باخ
درد الیندن اوخورام
دئیرلر  عشقینه باخ

———————————————-

اولماز خانم اولماز
سو گلیب نووا دولماز
هامیا نوبت اولسا
گلینه نوبت اولماز

———————————————-

آلمالار بوداخ-بوداخ
یاراندوخ بیز غم اوتاخ
نینه دیم کی کوسموسن
نیلیم کی باریشاخ

———————————————-

اورمیه نین باغی وار
باغندا چارداغی وار
سنون حسنون قدری
منده هجران داغی وار

———————————————-

اوزاخلاردان گلمیشم
یاغا یاغا گلمیشم
سن گل منیله دانیش
سنی دیوب گلمیشم

———————————————-

آغاج باشندا کشمش
قورویوب یئره دوشموش
منی سنه وئرمزلر
سققلینه دن دوشموش

———————————————-

آخشام اولدی وقت اولدی
سینم یارا تخت اولدی
قاپینی کولگه باسدی
یار آیریلان وقت اولدی

———————————————-

اوبا چوکدی چاخماقدان
سولار دویماز آخماقدان
گوزلریمده یاش قالماز
یار یولونا باخماقدان

———————————————-

آلا داغین بولودو
یتیملرین اومودو
الله بیر یاغیش گوندر
آرپا بوغدا قورودو

———————————————-

آراز آخار بوز اوسته
کباب پیشیر کوز اوسته
قوی منی ئولدورسونلر
دانیشدیغیم سوز اوسته

———————————————-

آراز آراز قان آراز
سلطان آراز خان آراز
گوز یاشینا باخان یوخ
قوی توکولسون قان آراز

———————————————-

آت منی گوتدی قاشدی
سوموکلریم چاخناشدی
گئدون آناما دئیون
منزلیم اوزاقلاشدی

———————————————-

آپاردیلار گولومی
ایله دیلر ظولومی
نه قویدولار دانیشام
نه کسدیلر دیلیمی

———————————————-

اون بیر، اون دان یاخشیدی
چوخا، دوندان یاخشیدی
دوشمنه بویون ایمه
ئولماق اوندان یاخشیدی

———————————————-

الیمده علمیم وار
قزیلدان قلمیم وار
یاخیندان گورنمیرم
اوزاقدان سلامیم وار

———————————————-

آغ چوخا، قارا چوخا
یاراشیر، یارا چوخا
سنه یامان باخانین
گوزونه یارا چیخا

———————————————-

اورمونون تلخ اوزومی
مزه سی تلخ اوزومی
سندن ال گوتورمه رم
دانناسا خلق اوزومی

———————————————-

آرازام نیله بندم
بولبولم گوله بندم
من گئدرگی قوناغام
بیر شیرین دیله بندم

———————————————-

آغلارام ئوز گونومه
گوله رم ئوز گونومه
فلک دوشسه الیمه
سالارام ئوز گونومه

———————————————-

آراز اوسته بوز اوسته
کباب یانار کوز اوسته
قوی منی الدورسونلر
دانیشدیغیم سوز اوسته

———————————————-

آراز اولوب آخیدیم
یاخاما گل تاخیدیم
ایتگین آرزولاریمی
آختاریدیم، تاپیدیم

———————————————-

آل کمری بئل باغلا
ساچلارینی تئل باغلا
نه یادا سرینی وئر
نه نامرده بئل باغلا

چهارشنبه سوری

قیش چیخدی گزیر کوچه نی بو تازه جوانلار

یوخ یوخ نه جاوان درس تمدن اوخویانلار

چون مدرسه قورتولدی چیخوب ائیله تماشا

چارراه خیاباندا دوشوب گؤر نئجه غوغا

قیزلار کی چیخور مدرسه دن خیلی دل آرا

نازیله گئدیر منزله گویا که مارالدی

بیردن گوروسن آتدیلار بمب رنگی سارالدی

بو بوینی یوغون قانمور اوشاقدور چوخی قورخار

یا حملی وار آرواددی جانیم زحمتی آرتار

یا تریکی دور نعشه قاچار معرکه فالخار

ظاهرده موحصلدی اوزی اهل کمالدی

لیکن کافی تشبیهدی لاب او مالدی که مالدی

چارشنبه سوریده اولوبدور بئله مرسوم

بو رسملری واجب ائدوبدور ننه کلثوم

تصدیق ایلیوب چوخلارینی زینب پاشا مرحوم

بیر ساعت اوتور دقتیله ائیله تماشا

بیر بیر او یازان رسملری ائیلیوم انشاء

اولسون شب چارشنبه گرکدور هامی دلشاد

چیخسونلار داما قیز گلین اوغلان کیشی آرواد

هر دامدا گرگ اود یانا اولموش بئله ایجاد

قیزلار اونون اوستوندن او ساعتده آتیلسون

اما آتیلاندا دییه جاق بختیم آچیلسون

دامدان ائیله کی اندیلر قورتولدی تماشا

بیر مجمعه خوش شب چره ائیلر مهیا

خورما یمش ایگده سوجوق و فخری و حلوا

بیر عیده خانیم قلبیده بیر نیت ایده رلر

گیزلینجه قولاق آسماقا جدیت ایده رلر

شال ساللاماقا بعضی ایدر شوقیله رغبت

باغلاللار انون شالینه هر شیدن اوساعت

خوش یمن اولار گر دولما پیشیرسه شاما آرواد

شامدان صورا بیر آز بادام اویناللا یاتاللار

آرواد کیشی هر تک تکی مقصوده چاتاللار

استاد کریمی مراغه ای